आमची गोष्ट
एक खोली. थोडं पाणी.
आणि खूप संयम.
आम्ही मोठे शेतकरी नाही. नागपुरातल्या १० × १२ फुटांच्या एका खोलीत चार रॅकवर आम्ही मायक्रोग्रीन्स वाढवतो — आणि तेच तुमच्या घरी पोहोचवतो.
आम्ही 2026 मध्ये एका साध्या नियमाने सुरुवात केली: कालची भाजी कधीच विकायची नाही. म्हणून लहान बॅचमध्ये उगवतो, डिलिव्हरीच्या सकाळी कापतो आणि स्वतः तुमच्या घरी पोहोचवतो.
आमची पद्धत
माती नाही. खत-कीटकनाशक नाही. काहीही लपवलेले नाही.
आम्ही कोकोपीट वापरतो — नारळाच्या काथ्यापासून बनणारं नैसर्गिक माध्यम. मातीत असणारे जंतू आणि किडे इथे येतच नाहीत, म्हणून कीटकनाशकाची गरजच पडत नाही.
खोलीत वातानुकूलन आहे, प्रत्येक शेल्फवर दोन LED नळ्या आणि दोन पंखे — म्हणजे बाहेर ४५ अंश ऊन असो की धो-धो पाऊस, आतलं हवामान वर्षभर एकसारखं राहतं. त्यामुळे चव आणि दर्जा कधीच बदलत नाही.
४ रॅक × ४ शेल्फ × ४ ट्रे = ६४ ट्रेची जागा
7 ते 21 दिवस
पेरणीपासून तुमच्या ताटापर्यंत
दिवस ० — बी स्वच्छ पाण्यात भिजवतो (पिकाप्रमाणे ४ ते १८ तास)
दिवस १ — कोकोपीटच्या ट्रेत सारखं पसरतो
दिवस २-४ — पूर्ण अंधार (ब्लॅकआउट) — कोंब जोर धरतात
दिवस ४-७ — प्रकाशात येतात, हिरवे होतात
कापणीचा दिवस — तुमच्या ऑर्डरनंतरच कातरीने कापतो, लगेच पॅक
याचा अर्थ एकच — आम्ही साठा करून ठेवत नाही. तुम्ही जे खाता ते त्याच सकाळी जिवंत होतं.
आमची खात्री
आम्ही चार गोष्टींचं वचन देतो
खत नाही, कीटकनाशक नाही
कीटकनाशक, बुरशीनाशक, रासायनिक खत — काहीच नाही. फक्त बी, कोकोपीट, स्वच्छ पाणी आणि LED प्रकाश.
ऑर्डरनंतर कापणी
फ्रिजमध्ये आठवडाभर पडून राहिलेलं आम्ही विकत नाही. तुमची ऑर्डर आली, मग कापणी.
वजन बरोबर
५० ग्रॅम म्हटलं तर ५० ग्रॅम — पॅकिंगचं वजन वेगळं. काटा तपासलेला आहे.
आवडले नाही तर
फोटो पाठवा आणि सांगा. वाद न घालता पुढची ऑर्डर मोफत. एवढं सोपं.
थोडं विज्ञान
मायक्रोग्रीन्स म्हणजे नक्की काय?
बी रुजल्यानंतर रोपाला पहिली दोन खरी पानं येतात — त्या टप्प्यावर कापलेलं रोप म्हणजे मायक्रोग्रीन. हा टप्पा साधारण ७ ते १७ दिवसांचा असतो.
या टप्प्यावर रोप बीमध्ये साठवलेल्या ऊर्जेवर वाढते. संशोधनात काही व्हिटॅमिन्स मोठ्या पानांपेक्षा मायक्रोग्रीन्समध्ये जास्त प्रमाणात आढळली आहेत; रोप मोठे झाले की त्यातले पाणी वाढते आणि तीच पोषकतत्त्वे विरळ होतात.
स्रोत: Xiao Z. व इतर, Journal of Agricultural and Food Chemistry, 2012 (USDA). आकडे पिकानुसार बदलतात; आमच्या ट्रेंची प्रयोगशाळा-चाचणी झालेली नाही.
स्प्राउट्स आणि मायक्रोग्रीन्स — फरक काय?
स्प्राउट्स (मोड) — पाण्यात, अंधारात, मूळासह खातात. २-४ दिवस. दमट असल्याने जंतूंचा धोका जास्त.
मायक्रोग्रीन्स — माध्यमात, प्रकाशात वाढतात. मूळ न खाता देठासह कापतो. जास्त सुरक्षित, चव जास्त.
रोज किती खावं?
दिवसाला २० ते ३० ग्रॅम पुरेसं आहे — म्हणजे एक चांगली मूठ. ५० ग्रॅमचा पॅक दोघांना दोन दिवस पुरतो.
टीप: रक्त पातळ करण्याचं औषध घेत असाल तर व्हिटॅमिन के जास्त असलेले प्रकार (केल, ब्रोकोली) सुरू करण्यापूर्वी डॉक्टरांना विचारा.
मायक्रोग्रीन्स हे अन्न आहे, औषध नाही. कोणत्याही आजारासाठी तुमच्या डॉक्टरांचा सल्ला घ्या.
अन्न-सुरक्षितता
FSSAI कडे नोंदणीकृत
आम्ही परवानाधारक अन्न-व्यवसाय आहोत. आम्ही प्रक्रिया न केलेले बी, RO पाणी, नवे कोकोपीट, निर्जंतुक ट्रे आणि स्वच्छ हात वापरतो, आणि कापणीनंतर लगेच भाजी थंड करतो.
FSSAI 21526056007626
एकदा चव घेऊन पाहा
ट्रायल बॉक्समध्ये तीन प्रकार थोडे थोडे आहेत. आवडले नाही तर सांगा — पुढची ऑर्डर मोफत.